VETRARSTARFIÐ

Félag eldri borgara í Hafnarfirði fagnar 50 ára afmæli sínu þann 26.mars n.k. og er því elsta félag á landinu sem tileinkað hefur starfsemi sína þeim sem eldri eru og farnir að huga að þeim tíma þegar draga fer úr þátttöku í atvinnulífinu. Að því tilefni er kynnt nýtt félagsmerki með dagskránni í ár.

Við stofnun fékk félagið nafnið Styrktarfélag aldraðra og var m.a. með að markmiði að efla velferð og tómstundir eldri borgara í bænum. Þegar það síðan hélt aðalfund á sínu 24. aldursári þann 12. mars árið 1992 höfðu félög með sömu áherslur verið stofnuð víðs vegar um land og landsamband um þau litið dagsins ljós. Fundurinn samþykkti að ganga til liðs við landsambandið, gera nafnabreytingu á félaginu og lagabreytingu í kjölfarið.

Einstaklega gott samstarf hefur alla tíð ríkt á milli Félags eldri borgara í Hafnarfirði og bæjarstjórnar. Skilningur og velvild hefur skilað markmiðum stofnenda með aukinni hagsæld fyrir íbúa bæjarins sem tilheyra aldurshópnum.

Þá hefur Hafnarfjarðarbær séð um allan rekstur,mannahald og húsaleigu á félagsmiðstöðvunum Hraunseli, Hjallabraut 33 og að Sólvangsvegi 1. Sá stuðningur hefur skipt sköpum fyrir félagsstarfið.

Í Hafnarfirði bjuggu á árinu 2016, 28.189 íbúar og voru þar af 2.851 einstaklingur eldri en 67 ára. Það er því að mörgu að hyggja í stóru bæjarfélagi.

Sameiginleg áhersla þeirra sem að starfinu koma eru lífsgæði aldurshópsins.

Það eru stoltir félagar sem kynna glæsilega dagskrá fyrir komandi starfsár. Hver félagsmiðstöð er kynnt sérstaklega hér í blaðinu og vakin er athygli á fjölbreyttari dagskrá að Hjallabraut 33 og kemur það til vegna rýmri aðstöðu þar, en áður.

Þá er vakin athygli á því að allar aðrar skemmtanir, þorrablót eða námskeið sem ekki eru tilgreind hér og ákveðið verður að halda seinna á starfsárinu, verða auglýst sérstaklega.

Nefndir innan félagsins eru 12. Þar starfar hátt í hundrað manns að því að auðga lífið með dansi, göngum, lestri, spili, sundi, söng og annari huglægri og líkamlegri næringu. Hugmyndaauðgi er þar í fyrirrúmi.

Starfsfólki og félagsmönnum vil ég þakka gott samstarf og það óeigingjarna og ómetanlega framlag þeirra til að gera öflugt félagsstarf enn betra og koma á þann hátt á móts við þarfir og væntingar eldri borgara í Hafnarfirði.

Ég hvet alla þá sem hafa tækifæri til að koma í félagsmiðstöðvarnar eða hafa samband til að sjá hvort þeir finni sér ekki eitthvað við hæfi.

Gleðjumst saman yfir framtaki framsýnna forystumanna, njótum fjölbreytileikans í tómstundum og fögnum á komandi vori 50 ára afmæli hagsmunagæslu eldri borgara í bænum.

Sjáumst, með bestu kveðju,

Valgerður Sigurðardóttir formaður

Loka valmynd
Breyta leturstærð