Ferðaefnd félags eldri borgara í Hafnarfirði vekur athygli á spennandi siglingu á Rín í apríl n.k.

Share on facebook
Share on email
Share on print

01.04.  Flogið með FI-520 kl.07:25 til Frankfurt og lent þar kl.13:00. Ekið þaðan, með tilheyrandi stoppum, til Strassborgar í Frakklandi þar sem fljótaskipið Gerard Schmitter bíður okkar. Gerard Schmitter er nýjasta og glæsilegasta skipið í flota skipafélagsins Croisieurope. Við komuna þangað fá farþegar afhenta lykla að klefum sínum og við munum gista um borð næstu 4 nætur. Kvöldverður um borð og að honum loknum kynnir áhöfnin sig og skemmtun og lifandi tónlist verður í aðalsalnum, eins og reyndar á hverju kvöldi.

02.04.  Þegar við vöknum verðum við komin á siglingu niður eftir Rínarfljóti. Við siglum framhjá borgunum Speyer og Mainz og síðan niður eftir Rínardal til borgarinnar Koblenz, sem stendur á ármótum Rínar og Mósel, en þangað komum við síðdegis. Þar verður boðið upp á gönguferð um gamla bæinn og út á Þýzka hornið. Eftir kvöldverð gefst farþegum svo kostur á að líta í bæinn en gætið þess þó að koma aftur um borð áður siglt verður.

03.04.  Siglt í bítið af stað til baka upp eftir Rínarfljóti og eftir Rínardal, þar sem hann er talinn fegurstur. Þessi hluti Rínar ásamt umhverfi er allur á heimsminjaskrá Sameinuðu þjóðanna og leiðin er vörðuð köstulum, þorpum og þjóðsagnastöðum, m.a. Lorelei-kletti þar sem vatnadísin Lorelei heillar til sín þá sem framhjá sigla með söng sínum.  Morgunverður og hádegisverður um borð. Komið til Rüdesheim um klukkan 14:00. Þar verður farið í vínsmökkun en síðan er dagurinn frjáls og ýmislegt í boði. Kvöldverður um borð en kvöldið frjálst í Rüdesheim og tilvalið að líta í bæinn eftir matinn. Siglt af stað um miðnætti.

04.04.  Morgunverður og hádegisverður um borð og komið til Mannheim fljótlega eftir hádegi. Þaðan er farið í skoðunarferð til Heidelberg þar sem finna má einn frægasta kastala Þýzkalands og þar er einnig elzti og jafnframt einn virtasti háskóli landsins. Heidelberg er heillandi borg, sem er vel heimsóknarinnar virði. Siglt aftur af stað um klukkan 18:00. Um kvöldið er svo “gala”-kvöld um borð þar sem boðið er til hátíðarkvöldverðar og hressilegrar kvöldskemmtunar.

05.04.  Komið til Strassborgar um morguninn. Haldið frá borði eftir morgunverð og innritast á hótel. Síðan verður farið í gönguferð um Strassborg, sem er falleg gömul borg þar sem mætast þýzk og frönsk menning enda er borgin á fornu átakasvæði þessara stórþjóða og hefur tilheyrt hvoru ríkinu um sig í gegnum tíðina. Kvöldverður á veitingastað.

06.04.  Ekið um klukkan 08:30 frá Strasbourg til Frankfurt þaðan sem flogið verður með FI-521 kl. 14:00 til Keflavíkur og lent þar 15:35.

Verð 209.500,-

Innifalið í verði er flug, flugvallaskattar, sigling á Rín með gistingu í tveggja manna klefa í 4 nætur, allt innifalið um borð, morgunverður, hádegisverður, kvödverður og allir drykkir, gisting í tveggjamanna herbergi á hóteli í Strassborg ásamt morgunverði, kvöldverður í Strassborg, allur akstur og skoðunarferðir samkvæmt lýsingu, íslenzk fararstjórn. 

Aukagjald fyrir einsmanns klefa/herbergi 36.500,-

Deila frétt

Share on facebook
Share on google
Share on twitter
Share on linkedin
Share on email
Share on print
Loka valmynd
Breyta leturstærð